...og í framhaldinu skulum við skoða þetta:

Tekið af visir.is:

Það er ekkert sérstakt við þetta mál," segir Guðrún Ögmundsdóttir, aðspurð hvers vegna stúlkunni hafi verið veittur ríkisborgararéttur þrátt fyrir að hafa aðeins búið hér í stuttan tíma. Hún segir það í höndum Alþingis að taka fyrir undanþágur af þessu tagi og að það sé ekki einstakt að einstaklingar fái ríkisborgararétt þrátt fyrir að hafa aðeins búið hér í stuttan tíma. „Ég minni bara á mál Bobby Fischers," segir Guðrún. Alls sóttu 38 manns um ríkisborgararétt til Alþingis en aðeins 18 hlutu náð fyrir augum nefndarinnar. Í Kastljósi var sagt frá því að einungis þrír þingmenn úr allsherjarnefnd hafi komið að ákvörðunartökunni, þau Bjarni Benediktsson, formaður nefndarinnar, Guðjón Ólafur Jónsson, varaformaður og Guðrún.

Guðrún segist ekki tjá sig um einstök mál sem fyrir nefndina koma og ennfremur að hún muni ekki málsatvik í þessu sérstaka tilviki. Nefndarmenn eru bundnir trúnaði og hún segir það ekki hafa tíðkast að færa þurfi rök fyrir því að þessar undanþágur séu veittar. „Við höfum ekki þurft að gera það hingað til," sagði hún og bætti við að ástæður fyrir því að undanþágur séu veittar geti verið margvíslegar.

Það sem mér finnst athyglisvert í svörum Guðrúnar er það að hún vísar í mál Bobby Fisher sem réttlætingu á því að veita ríkisborgararétt í þessu tilviki.  Leiðréttið mig ef ég fer rangt með en var það ekki gríðarlega umdeilt mál á sínum tíma?  Var ekki þrýstihópur sem kallaði sig "Vini Bobby Fisher" sem hafði áhrif í því máli?  Er þetta þá fyllilega sambærilegt og getum við vitnað í afgreiðslu Fishers þegar aðrir útlendingar sækja um ríkisborgararétt?

Einnig segir hún að það hafi ekki þurft hingað til að færa rök fyrir því að undanþágur séu veittar.  Nú??!  Hvernig er þá farið að í nefndinni?  Eru nöfnin sett í hatt og dregið úr þeim?  Ég efast nú um það en einhverjar ástæður hljóta að liggja að baki ákvörðun sem varðar hag einnar manneskju jafn mikið og ákvörðun um ríkisborgararétt.  Hvað með þá sem er hafnað?  Þarf að færa rök fyrir höfnuninni? 

Ég bíð bara eftir því að Bjarni og Guðjón útlisti minnisleysi sitt í fjölmiðlum, þá væri sirkusinn loksins byrjaður fyrir alvöru, í staðinn fyrir að koma með svör við spurningum sem meirihluti þjóðarinnar virðist spyrja í dag (miðað við umræður á netinu, kaffistofum, í stigagöngum og já, bara alls staðar) þá á að reyna að grafa þetta. 
Mér finnst eiginlega verst að ég skuli aldrei hafa kosið framsókn (Jónína er jú í framboði í mínu kjördæmi) svo þeir missa ekki atkvæðið mitt.  Það er reyndar huggun harmi gegn að þeir skuli ekki hafa haft það til að byrja með...

Athugasemdir

[Þarfagreinir, 27.4.2007 kl. 15:57]

Já, þetta er til skammar allt saman, og mikilvægt að við missum ekki sjónar á aðaltriðinu, sem er það að afgreiðsla ríkisborgararéttar er mjög svo augljóslega vanhugsuð og illa skipulögð. Ég vil fá að heyra að það verði tekið á þessu máli og þetta ferli endurskoðað alveg frá grunni - einungis þá verð ég sáttur! Það er auðvitað bara argasta bull þegar fólk í ábyrgðarstöðum getur ekki né vill ekki fært nein rök fyrir mikilvægum og örlagaríkum ákvörðunum.

[Guðrún Þóra Hjaltadóttir, 27.4.2007 kl. 16:04]

Þetta er eitt siðleysið enn. Kannski er stúlkan á flótta eins og Bobby ?

Það er alveg sama hvert litið er alls staðar eru þeir sem að ráða siðlausir. Vina veiðiþjóðfélagið er greinilega það sem þjóðin vill. Ég les það alla vegana út úr því hver ræður hverju? Sjálfstæðismenn þurftu til dæmis að leita víða fanga og þannig mætti lengi telja.

[Ísdrottningin, 3.5.2007 kl. 17:33]

Já, Kolbeinn hennar réttindi virðast vega þyngra en nokkurra annarra því hún er nú orðin íslenskur ríkisborgari einungis 10 dögum eftir að hafa sótt um.   Ég efast stórlega um að slíkt eigi sér nokkurt fordæmi, hvort sem er hér á landi eða annarsstaðar.

Stúlkan er ekki gift Íslendingi, á ekki barn með Íslendingi, hefur ekki búið hér eða stundað hér atvinnu síðastliðin 7 ár og síðast en ekki síst, ætlar ekki að búa hér á næstunni heldur stunda nám í Bretlandi.

Það liggur alveg ljóst fyrir að án áhrifa Jónínu hefði þessi stúlka ekki fengið þessa fyrirgreiðslu.  Spurningin er bara hvort áhrif Jónínu voru bein eða óbein.

[Upprifinn (IP-tala skráð) 7.5.2007 kl. 01:12]

Gaman væri að vita hvort einhverjir ættingjar nefndarmanna sem samþykktu umsóknina hafa nýlega fengið vinnu hjá umhverfisráð'uneytinu eða stofnunum því tengdu.